بو دور جنابیوه عرضیم اَیا ستوده جناب
بو قانلو چولده اِیدیم قانیله اَلیمی خضاب
منی غم آتشینه کربلاده یاندیرما
یتیمم ای عمو جان خاطریمی سیندرما
شکسته گوگلیمی سیخما عمو سلامیمی آل
حسن نشانه سیم قولاروی بوینوما سال
یخیلمشام قاپووا رحم قیل پناه سیزام
مُکدَّر اِیلمه دیندیر منی گناه سیزام
اگر قبول اِیده سن عرضیمی ادّعامی عمو
گرگ بو چولده اوغولسوز قویام آنامی عمو
منیده مرخّص ایله ای مغفر اولوالعَیاب
سوسوز باشی کسنلر ایچینده ایله حساب
***میدانه قاسم****
آتام دییَردی سنی وئر میشم عمووَه غلام
که اولور یتیملرون منزلی خرابه عمو
گِیدیر کفن بِئلیمه قلج باغلاسال یولا
بسدور داخی یانوندا منی ساخلاما عمو
گوزلر بهشتیده یولووی اکبر جوان
الله رضاسی گل یولومی باغلاما عمو
مگر که نوکری قویمازلار هیچ حسابه عمو
آتام ئولوبدور یتیمم ندن اوزیمه باخمیر سان
گیدوم شکایت اِئدوم ابو ترابه عمو
***قویمارام****
ای ذلیل لشگر عدوان عمو
جان عالم جانیوه قربان عمو
جانیم منیم تنگه گلوبدور غصّه دن
إئتمه منی بی بهره بو فیضه دن
قلبیمی سیندر ما ای صاحب جلال
منِ یتیمه وئر گیلن إذن جدال
****اذن جهاد****
التفاتون یوخ أیا سلطان دین
قاسمی سالدون نظردن یا حسین
غصّدن قان اولدی باغریم ای خدا
بیر نفر یوخ دردیمه إئتسون دوا
بیر زمان ساکت اول ای سینه داغ
وئر گیلَن سلطان مظلومه سن قولاخ
****بو گون****
گلوب تلاطمه درد غملریم داشدی
آتا وصیّتی ای آه یادیمه دوشدی
امّا وصیّت اولاده گلور نه عزیز
ئولَنده باغلیوبدور بازومه بیر عجب تعویز
إئدوب محاصره اولاد حیدری دوشمن
باخوم گوروم نه وصیّت إئدوب آتام امام حسن
قربان اولوم بو خطّیوه ای زهر ایچن آتا
الله یولوندا اوز اوغلوندان گِئچن آتا
شکر خدایا دردیمه درمان یازوب آتام
باشیم سوسوز کسیلمَگه فرمان یازوب آتام
گورسَتمَدی عموم منِ دل داغداره یوز
قربان گوروم داخی گتور مز سوزیمه سوز
****بلبل بهار****
السّلام ای زادۀ ختم رسول
السّلام ای رهنمایه تیز گل
یوسفون دوشموشدی غم زندانینه
قیل تماشا قتلیمون فرمانینه
مراد کامه یتیشدیم تاپولدی درمانیم
شهید اولماقا وار الده یاخشی فرمانیم
بویور بو نامیه باخ ای امام مستحسن
یازوبدی قتلیمه فرمان آتام امام حسن
بو خطّ شاه زمن حضرت امام هدا
بوسن بو من بو دا خطِّ روز عاشورا
***عمل***
آتام فرمانینی گوردون عمو جان
داخی اَمرون ندی ای جان جهان
منی ایله مرخّص ای یگانه
داخی بیر اوز گه سوز ایتمه بهانه
****شاهد اولون****
ایّها القوم بد اختر هامی ویز شاهد اولون
ای گئدن گوگده ملکلر هامی ویز شاهد اولون
کربلاده من نوکر لیقی ایدّوم قبول
زادۀ ساقی کوثر هامی ویز شاهد اولون
****اولسون****
گوتور باشیندان قرمزی دوواق
سال باشیوه قاره نوش إئت فراق
ایندی گورورسن عمو اوغلی داغی
یقین بیله طوی مبارک اولماز
****یاس ائدرم****
عروس زاده تفاقون پوزولدی آغلا گلان
آییر دلار منی سندن باشیوه قاره باغلا گلان
بو دم ایشدّون اوزون دوشمنون شهادتینی
نصیب اولا گورسن قاسمون شهادتینی
****به خاطر اکبر****
اگر منیم ایچون وصیَّت بو گون بیر عاردور
ولیک حرمتیم آرتوق وصّیَّتم واردور
بیری بودور که وفا إئدوب آنامدان آیرلما
ایکیمجیسی باشیوه شال قرمزی سالما
اوچومجیسی که اگر قتلگاهه دوشسه یولون
کسیک بوغازیمه حمایل ایله ایکی قولون
****آیریلمام****
وقوف سایه سنی بو منزله سالان دگلم
بو قدر بول که داخی من سنه قالان دگلم
دولاندا گوزلریوه جور ظلمیله توپراق
که چکمه گوزیوه سرمه ای علم کشیده فراق
****یوزیمه****
سوزوم تمامی بودور بیرده زحمتیم چکه سن
بو ایکی دسته گولی قبریم اوسته اکه سن
داخی بو شمعلری قبریم اوسته قیل روشن
گورن دیسون که بو دور قبر قاسم بن حسن
****اکَرم****
آنا جان گَل گیلَن گور نه فغاندور
آنا جان جان سنون جان نو عروسین
گیدوم من سیز قالون ساق و سلامت
عروسیمدن آنا جان اول خبر دار
کیمه بس تاپشوریم خدایا بو بینوانی
محبّت قیل عروس باغری قانه
«بلافاصله در حضور زینب بگو»
****یگانه****
گَل گیلَن ای زینب بی خانمان
ای بی بی جان گل واریمدور بیر خبر
اولموشام باش ویرمگه آماده من
جان عروسین جان آنامون جان سنون
بیچارنون
«بلافاصله در حضور امام گوید»
السّلام ای شاه اورنگ جلال
السّلام ای شاه بزم وصال
بو گون منه آتالوق ایلدون اِئوین آباد
یتور دوباره گنه مطلب مراده عمو
یقین که ئولمه لییَم قوی ئولوم قباقینده
منای عشقیده کسیلسون باشیم ایاقینده
بو دور منیم عرضیمی تمامه یتور
من ئولندَن صورا عمو نعشیمی آنامه یتور
****ساخلاسون***
ای شاه کم سپاهیم عمو الله ساخلاسون
قوشونسیز پادشاهیم عمو الله ساخلاسون
بر هم اُولوب اساسیم قولسوز دوشوب عبّاسیم
داخی قایتماز قاسم عمو الله ساخلاسون
ای حرم آل اطهار
«یک کمی مکث نگهدار» - عمو الله ساخلاسون
خدا حافظ ای بی کسان حسین
خداحافظ ای نور سان حسین
خداحافظ ای اهل بیت حرم
خداحافظ ای امّتان کرم
خداحافظ ای کربلا شاهی عمو
خداحافظ ای قمر بنی هاشم عمو عباس
خداحافظ ای بی بی زینب غریب بی بی
خداحافظ ای سوسوز علی اصغر
خدا حافظ ای عمۀ دل فکار
خداحافظ ای زینب بی قرار
خداحافظ ای اوغلی اُولموش آنا
گلستان عیشی پوزولموش آنا
****طبال چال طبلی****
« در جلو اشقیا بگو»
ای قوم سیز بیلون من پیغمبر اوغلیام
شهزاده قاسم شه مردان اوغلیام
جنگ گاهه گلمیشم تمام سرور لر آتلانون
میدان کارزار دلاور لر آتلانون
فرزند مرتضی گُل خیر النساء منم
نورسته سرو گلشن آل عبا منم
نوردیدۀ حسن مجتبی منم
قاسم آدیمدور فتح دو خیبر اوغلیام
****نامعروف****
منی بو لشگر بی شرم و حیادن خبر آل
گِئت وفا صاحبنی اهل جفادن خبر آل
ضیغم و پُر هنرم صفدر لشگر شکنم
صولت ستودمی دار فنادن خبر آل
****ای قاسم****
قیلما مندن بیله بیهوده سؤال ای ارزق
اولور معلوم عمر وندن دویوبسان جانه ای ازرق
گلوبسن زوروه مغرور اولوب جولانه ای ازرق
آدیمی قبضۀ شمشیر بلادن خبر آل
ضرب شتمی گوروب دورد اوغلون
گیئت جهنمده او اولاد زنادن خبر آل
****ای قاسم****
نوبَتیندور گِئده جکسن بیلورم نیرانه
آتش پر شرر قهر خدادن خبر آل
رقم قتلیوی قاسم آدینا چرخ یازوب
عملین گردشینی تقدیر قضادن خبر آل
****ای قاسم****
کربلا شاهی عموم چون منی داماد إئلیوب
باخگیلان أللریمه قانلو حنادن خبر آل
آتامون بیر نفر ایستکلو عزیز اوغلی منم
زینب خونجگر بخت قَرادَن خبر آل
****ای قاسم****
ایا ظالم بی همیّت و انصاف
تمام قیل بیله بیهوده قیلما لاف ی گزاف
اجل دوتوب سنی ای ناکس زنازاده
لازم دگل بو قدر قیل و قال دعواده
خیال إئتمه اوشاقدی مجتبی اوغلی جوان قاسم
گوررسن من آچاندا پنجۀ مردانه ای ازرق
****
دیلون باغلا ألون آچ دورموشام سدِّ سکندر تک
تماشا إئله فرزند شه مردانه ای ازرق
اگر یوز مین قوشون اولسا تماماً بیر به بیر قیرّام
قلنج ضربتیله ویرّام عالمی طوفانه ای ازرق
سنون تک مین دلاور اولسادا باک ائتمرم اصلا
بو دعوا قلنج دعوا سیدور هیچ اوزگه فکر ایتمه
دگیل لازم اَل آتماق نیزه و پیکانه ای ازرق
سنی بیر ذلّتیله اُولدوروم عالم دِئسون احسن
بو رزمی نظم ایدلَّر قمری نالانه ای ازرق
****منی****
دگل بیزده عادت ایا بت پرست
اولاق رزمده دوشمنه پیش دست
سنوندور ازل نوبت ای گرگ پیر
دوباره آچار پنجه سین نره شیر
****نوبت آخرین****
منه ویرمه موعظه و پند
نه قدر ایسته سن ویر گیلن زور مند
هر اولقدر اولسا قولین قوّتی
دریغ إئتمه ویر قویما منه مِنّتی
یتیش قاسمون دادینه ای خدا
گیروب جنگه ازرق بی حیا
یا صاحب ذوالفقار وقت مدد است
عزیز جوانم مدد یا علی غریب جوانم
مدد یا علی
****سر ازرق را به حضور امام برده)***
قوشون قیر موشام ای شه کربلا
یتوب جانمه هر طرفدن بلا
پوزوب صفلری یخموشام بیدقی
شجاعتله اولدورموشم ازرقی
بو گون سندن ای کان جود کرم
هنر قیلموشام جایزه ایستیرم
****خلعت اوغول****
سولوب غنچه لقدان گُلیم العطش
یانوب دِئل دو داقیم دِئلیم العطش
علاج إئله بیر جرعه سو یانموشام
یاوقدور سوسوزدان أُولوم العطش
****جوان بالام****
خداحافظ ای دوستان حسین
خدا حافظ ای بی کسان حسین
خداحافظ ای نور سان حسین
خداحافظ ای اهل بیت حرم
خداحافظ ای اُمَّتان کرم
«بلافاصله جنگ نموده و بگوید»
یا صاحب ذوالفقار مدد است
عزیز جوانم مدد یا علی غریب جوانم مدد یا علی
****در موقع شهادت****«چند بیت کافیست»
بر روی زانوی مبارک امام حسین در آخرین وداع
****
ای دادخواهیم داده گل بیداد اَلیندن داد عمو
صید إئتدی صیّاد اجل إئتمز منی آزاد عمو
بیر زخمدار آهو کیمی قانیم رواندور سو کیمی
دامه دوشن تیهو کیمی صید إئلیوب صیّاد عمو
هر قدر گلّم شیونه رحم ایلمز دشمن منه
قالمیش امیدیم بیر سنه إئله منه امداد عمو
ازبس هجوم إئلوب عطش عارض اولور قان ایچره غشّ
وار قتلیم اوسته کشمکش وئرمز امان جلّاد عمو
ووردوقجا بو قوم دنی من سسلرم داده سنی
درک إئت اماندور تیز منی مظلوم ئولور داماد عمو
گلدون اگر امدادیمه یاخشی یتیشدون دادیمه
رزم إئتمه باخ فریادیمه إئت حالیمی بیر یاد عمو
گور بیر منیم افغانیمی دشمن دوتوب هر یانیمی
گل راحت ایله جانیمی ئولدوم من ناشاد عمو
آت چاپدیلار سینمده بسآخِر شکست اولدی قفس
سیندی سوموکلر باتدی سس گلمز داخی فریاد عمو
چون ظلم بی پایان اولوب سیلاب اشکیم قان اولوب
توپراقیله یکسان اولوب بو قامت شمشاد عمو
ای فخر آل هاشمی گور «ذهنی» تک گوزیاشیمی
آل بیر دیز اوسته باشیمی تا جان ویروم دلشاد عمو
****آغلار****
اقول اَشهَدُ أَن لا الهَ الی الله
محمد است رسول علیَّ ولی الله
***نوحه و مرثیه ترکی 2****
« از زبان حضرت قاسم دربر روی زانوی امام در واپسین لحظات»
****
اولورم بیرجه یِتیش داده عمو
قویما نعشیم قالا صحراده عمو
باشیم اوستونده اگر گَلسه سسون
جان ویرر جسمیمه عیسی نفسون
آناما سویله منی گوزله مَسون
قالدی حسرت منه دنیاده عمو
آلدی اطرافیمی بو لشکر کین
یولوموی کَسدی عمو شیث لهین
داخی گَلماق منه چوخ اولدی چَتین
سَن اوزون گَل یِتیش امداده عمو
سسلورم، یِتموری بیر یانه سسیم
دَگدی اوخ سینمه سیندی قفسیم
سَن گَلینجه اولور آخِر نفسیم
چوخ دگوب یاره بو ناشاده عمو
منی یالقوزلادی بو قوم عدو
سوسوز اُلدوردی عمو، ویرمدی سو
قرمزی قانیم اولوب آب وضو
ایستی قوملار منه سجّاده عمو
شاه بازون دیمه بی شه پر اولوب
تیر اعدا منه بال و پر اولوب
قاتلیم اَلده دوتوب خنجر اولوب
باشیمی کَسماقا آماده عمو
سوسوز اُلماق نه که زحمتدی منه
بو یولون زحمتی راحتدی منه
اُلورم عین سعادتدی منه
سال بو حالتده منی یاده عمو
ای عمو قالدی قوری یرده باشیم
سایه گورمَز بُلورم بیرده باشیم
ل...ِ الحمد اولوب آخِرده باشیم
آشنا خنجر فولاده عمو
